Mazoet
"Ik hém slèècht joews," zi die van ós giestërëmèrrëgënd toen z'öt dë kéldër kwààm.
Ien jéstë ienstansie nëgeejërdën ëk heur. Ik wààr nog gé këtiejër óp en ëk ha zjuust ien ménnëm bótram gëbeetën. Në vólkóuwërënbótram mi jérbizzëzjëlèèj en lèèvërpateej. Ik ha mën èègë vólóp gëkónsëntreejërd um diejën të smèèrën, want smèèrdë të veul van 't eejën of të wénnig van 't andër, dan smikt dè niej. Die vërhààwing zjëlèèj-pateej moet zjuust zén. Dör zén ik nën heejëlë nippën ien.
Dör gòn ëk nö ës va gënietën, ha'k nog gëdócht. Nie sló'ën, mèr óp mën dóuwëj gëmèkskë gënietën.
"Dè'k slèècht joews hém," zi zë vanhèèr.
Dër was gén óntkommën èn. Ik keek ààchtër heur deur.
"Zittë gé nöö na mé gat të zien?" vroeg zë.
"Neejët. Ik dócht gëwóuwën dè gë nog në cómpanjon bé ha," zi ëk, "want slèècht joews kumt nóuwët alleejën." Ik beet nog ës ien ménnëm bótram. Ë klèèn hèpkën. Zjuust gënoeg um tëgëlij'ërtijd në slók va mén zjat koffiej të slörrëpën. Zààlig, die cómbienassiej.
"Dë mazoet is bëkans óp."
"Bëkans is nog nie gans. En tën andërë, mazoet? Tën jéstën eest dör nog vulstë vruug veur, tën twéddë: dè is nie të zuipë, zó në zuutëm brak. Tën dèrdë vijn ëk dè vërkrààchting van 't biejër en tën vierdë: gë hét nie tëgoei gëkee'ën. Ik hém giestërë nog nëm bak Stélla gëkòòcht en tën déstag nog ààchttien groewëtë flèssë cóóla, umdè diejën óp rëclààm was ien dë Colruyt."
"Och jóng, ónneuzëlèèr, gë wit goe gënoeg wor dè't schèjt. Tweejëduuzënd lietër hémmëw nóuwëdig. Dan kunnë wë wir nën heejëlën tijd vröt en dè kumt goeiëkóópër öt."
Pff, dè heujër ëk dus nie gèèrën. Vural umdè'k öt èrvààring weet dè gë dan minstës 2.000 euró èn öw bóks hét en sóms nog veulë meejër. Ik wèjjër dör óngëmè'ëlëk van. Die van ós is zjuust andërzum. Die bëgint al rémsëlkës të màà'ë bé't gëdààcht va gèld ópmàà'ën alleejën. "Dan kunnë wë wir nën heejëlën tijd vröt en dè kumt goeiëkóópër öt." Dè zinnë'ë gi nog lang dur ménnë kóp spóó'ën, dè weet ëk nöö al.
"Kààw eest përtang nog niej buitën. Hémmëw dè dan wöl ècht nóuwëdig?"
"Dè zégdë gé nö allë keejërën é, dwap! As gë nog wult gòn doesjën dë kommëndë mòndë, dan héddë toch wèrrëm wauwëtër nóuwëdig, of niej? Dör héddë dus mazoet vur nóuwëdig, andërs héddë gé wèrrëm wauwëtër nie mir. Of paktë gé lievër në kààwën doesj? Ik zal öw ës 'n pint kààw wauwëtër óóvër öwë jö'ël kappën, dan wittë drèk hoe dè dè vuult. En dër kommë nog veul kààw dààg, zallë. Gé zé fërdoemën alté dë jéstën um dë zjëfààs èn të zéttën, kààwkleum!"
Zë hi ë punt. 't Wèrrëm wauwëtër hém ëkik nie ötgëvónnën. En ëk zal alté allës próbeejërën um óndër kòòstën óndëröt të kommën, dè is ménnën twéddë natuujër. Óp zën èègën is dè gén slèèchtë ienstélling, want gèld óóvër dëm ballëk smijtën is nóuwët ë goei gëdààcht.
Wittë wa, ik gòn na die van ós löstërën en mazoet bëstéllën. En ëk gòn ër génnëm bótram mindër vur èètën, want kààw léjjën, dè's wöl 't léstën.
Hoe dan ók, ménnëm bótram smikt lék as nóuwët tëveurën. Mi zjëlèèj en pateej. Dobbël bëleed, zógëzeed. Vwalla! Ik bëgin ók al rémsëlkës të màà'ën. Gèld moet trullën. Of rollën. En as gë génnën hongër léjdt en gë zit wèrrëm, dan stòddë al heejël wijd!
Danny VANDENBERK
