Dër zén veul dings die dè’k gèèrën hém, of bèètër gëzeed: veul dings wördè’k zot van zén. Zówas bëvurbeejëld spiegëlèèj’ës mi currykétsjup, gëróstërdë casjoewnóuwëtën, gëzààtë chips, óngëzààtë mén gëdààchtën ópschrijvën, biljààrën, joewjauwër viejërën en die van ós, um ër mèr ë zéstal të noemën. Ien willëkeurigë vollëgordë dan nog, want èègëlëk èèt ëk lievër chips dan spiegëlèèr.

En ottó’s, Danny, zéddë dör ók nie zot van? Dè vrààgë zë mé óuwët wöl ës. Um heejël eejërlëk të zén: ottó’s duun mé niks, bëhallëvën óp van die ottósalons, as ër zó’n halfnaks vrammës óp dë kapóó wa sènsuuweejël li të zén.

Dër is mè jénnë wààgën diejën dè’k mi veul goesting bëstuujër en dè is ménnë wing’ëlwààgën, mén wing’ëlkar. Of dè ër dè nö eejën van dën Alma, dë Colruyt, dë Spar, dën Aldi, dë Lidl, of dë Jumbó is, dè mékt mé allëmòl gén fluit öt. Ik vijn óóvëral ménnë wég, zóndër vërlóuwërë të rijën. Puujër öt gëwòntë of óp gëvuul. Dè’s ‘n talènt.

Ik duun dè ók gëwóuwën gèèrën, zówa gòn wing’ëlën. Dör hoeft die van ós nie bé të zén, neejë, dan eest alté ambras, want die kupt të veul en diej is alté gëprésseejërd. Dè mut vur mé óp ‘t gëmèkskë gòn. Wa hi në miens toch alté të vërléttën? Ik kan dör ménnën tijd vur pa’ën.

Óp zuuk gòn na joew próductën, prijzë vërgëlij’ën, cómbienassies bëdéng’ë vur as ëk strak middag mut màà’ën (wèllëk vleejës pést bé wèllë’ë gruuntën en mut dör dan rijst bé of pasta of toch mè wir pëtattën?) of gëwóuwën wa rondkij’ën en në goejëndag zéggën teegë dën diejën of dën diejën, want alté en óóvëral komdë wöl iemand teegën diejën dè gë ként. Ècht plëzant.

Wa gë bëvurbeejëld ien dë Colruyt wöl hét, dè zén van die zwauwër véttigë plastie’ë flappën die dè gë ópzij mut douwën um ien ‘t friegó-deejël të gëràà’ën. Jóng, dör hém ëk nën hee’ël èn! As ër jénnë vlak vur öw binnë gi, dan is dë kans groewët dè gë zó në véttigë flap teegën öw gëfrèt èn gëgóuwëjd krégt, want dë meejëstë miensë kij’ë na niks. As gë dan ók bëdéngt dèttër zóuwë hóndërdë wing’ëlèèrs allë dààg teegë die flappën ènlóópë mi hun véttig gëziecht, hun ongëwassë hauwër of er mi hun vuil hààn èn zittën të frutsëlën, dan kundë wöl vërstòn dè gë dör heejël wa ziektës kunt ópschauwërën. Neejë, dör blijf ëk lievër zo veul meugëlëk ëwég.

Allé jàà, ien dë wéntër dan toch, want ien dë zóómër kan ‘t dör wöl ës intëssant zén. As ‘t buitë wèrrëm is en dë zón schént vóllëmbak, dan zén dë vralliej alté lóchtgëkleejd. ’t Zén dëdie diedè’k dan ààchtërnààgòn ien dë groewëtë friegó van dë Colruyt, want dör eest dan zó vërré’ës kààw dè gë dë vralliej “óp bëpòldë puntën” kunt zien vërandërën, as gë vërstò wa dè’k wul zéggën.

‘t Zit ‘m ien dë ditajs, dè zég ëk öw. Dè is mi allës zóuwë. ‘t Nuttigë èn ‘t èngënààmë koppëlën, zóuwë noemë zë dè. Ik gòn wing'ëlën um mé gëzin dë kòòst të gèèvën, mè tëgëlij’ërtijd gèèf ëk mén óógën ók dë kòòst. En dörbé: kòòstën héddë alté, zèllëfs èn ë lang grijs gësneejën of èn ë krintëbróuwëd. En ëk gèèf ‘t toew, dë vralliej die ien hunnë jóngën tijd alté brààw hun kuisjës ópgëèètën hémmën, die vollëg ëkik ‘t liefstën.

Danny VANDENBERK