Ë klèè stasjónnë'ën

In een klein stationnetje, 's morgens in de vroegte
Stonden zeven wagentjes netjes op een rij
En het machinistje draaide aan het wieletje
Akke akke tuut tuut, weg zijn wij

Worum, vrààgd'öw èègën af, worum pruttëlt dittë spissiefiek kindërliej'ën al vërschillëgë wèè'ën ien mén alté broeiërigë en heejëtë hèrsënpan? Dë léstë tien jauwër hém ëkik fërdi'ë génnën treinwagón langs dëm binnëkàànt gëzien, lòt stòn zeuvën! 't Hi al ien allë gëzéttë gëstòn en 't is al óuwët van allë dàà'ë gëschreejëwd: ik spóuwër ëkik niej.

Óndërtussë weet ëk wordè't va kumt. Sins ë pauwër wèè'ë sti ër ien ós keu'ën ë klèè stasjónnë'ën. 't Sti ër zówa kwansies, vërschóuwëlën, zówa wéggëstóó'ën ààchtër wa plantën en bloempöj'ës. Èègëlëk is da wöl ë kërjeus en auwërig dink, zallë. Dër stòn heejël wa cijfërkës en paramèètërkës óp: dën tèmpëratuujër binnën en buitën, luchtvochtighéd, windsnèlhéd en -richting, neejërslaghoeveulhéd en luchtdruk. Ós èègë klèè stasjónnë'ën, dè'kik allë dààg 's mèrrëgës ien dë vruugtë toch ës tëgoei wul bëstuudeejërën.

Koddig is ien mén bëlèèving ók 't wóuwërd "kwansies" dè'kik tëzjuust gëbröktën. Dè is ë sienóniem van "ónópvallënd", mèr ók van "schijnbauwër" en "óógëschénlëk".

Óógëschénlëk weujërdt vandààg alleejën dë zón. Zë gi schijnën, dör kundë van óp èn, want zë sti ien't groewët óp dën displeej. Wa dè gë nog nie wies, béstë lèèzër, is dèttër ien ós weejërstasjónnë'ën ë vurspèllërkë zit ien dë plak van ë masjienisjë. Ik weet niej èn wèllëk wielë'ën dè iej zjuust drèèjt, mè öténdëlëk wiet iej wöl wa weejër dè't dë rèst van dën dag gi wèjjërën.

Och, wie wit zit ër gé vurspèllërkën ien en hi dè masjienë'ë zén èègë gëvuulës en vollëgt 't zén ientuuwiesie en instingt. Dën tèchniek sti vur niks teegëworrëg, mi ientëlliegènsiej die hoe langs hoe mindër artiefiesjeejël èn't wèjjërën is. Zó hi is weejërstasjónnë'ën ók 'n heejël joew fungsie: dë gëvuulstèmpëratuujër. Auwërig é, vur ë masjien të zén.

Sààmë mi die van ós (zé is dë vërantwóuwërdëlë'ën ènkóópër van dè dink), stèldën ëk vààst dè dën échtën tèmpëratuujër en dë gëvuulstèmpëratuujër allë dààg 't zèllëfdë weejërën. "Buitën eest 14,3 grauwëdën en 't vuult ók èn as 14,3 grauwëdën. Wààw! Fèrrëmën ènkóóp! Dör hémmë wë tëminstën iet èn!" En dan di'ëk zjuust ofdè'k gieng umvallë va vërbauwëzing. Mè dör zén ëk jérgiestërë mi ötgëschèjd toendè'k bënàà ècht umviel umdè'k ë koffieleepëlkën téégë ménnë kèèj èngësmeetë kreeg.

Mè, eejërlëk is eejërlëk: giestërë wààs't 13,2 grauwëdën en dë gëvuulstèmpëratuujër van't masjien was 15,6!

't Hi dus wöl deegëlëk gëvuulës, zjuust lék as ëkik, al hém ëkik zë wa di'ëldër, ók al umdè die van ós allë dààg drie-viejër zjattë koffie dringt en zë vuls të gèèrë mi leepëlkës smit na hurrën ónschuldigën èchtgënóuwët. Vanweegë slèècht gëdrag, zógëzeed. Kunt ër mèr ës èn öt.

Ien allë gëval za'kik 'n heejël slèècht weejërstasjónnë'ë zén, want ëk wijk cónstant af, zén të wénnëg óbjéctief en vuls të gëvuulëg. 't Énigstë dè èn mé klopt is mén hèrt. En dörbé: ménnë wèrrëlë'ë lèèftéd is 54 en ménnë gëvuulslèèftéd is 23. Dör zit vollëgës mé toch wa veul rék óp.

Och, wa mékt 't ók öt. Óóvër 100 jauwër hémmë bëkan allë miensën die nö lèèvën hun éndstasjón al bërékt en zén zë vërvangën dur andër miensën, of dur róbottë mi of zóndër gëvuulës. "Akke akke tuut tuut, weg zijn wij."