> ## Content Index
> Fetch the complete content index at: https://www.delommelsegazet.be/llms.txt
> Use this file to discover other available public pages before exploring further.

# Zé vrij ien öwë kop!
- URL: https://www.delommelsegazet.be/ze-vrij-ien-owe-kop/
- Published: 2026-09-20T22:10:03.000Z
- Updated: 2026-09-20T22:10:03.000Z
- Author: Danny Vandenberk
- Tags: Prauwët van Danny, Recent nieuws uit Lommel

Deezë nààcht hém ëk nog ës ààwërwéts gëdrómd. Dè'k trug ë klèè mènnë'ë wààr dè èn't speulë was, mi dë mèskës öt dë strauwët. Jést hàànëw vangërkë gëspuld en tërnàà wuldën zë dè'k meejdi mi kurkëspringën. Jést wuldën ëk niej, umdè'k vón dè dè meejër iet was vur truttëmiej'ës en zjënéttën, mè zówas gëwónlëk liet ëk mën èègën toch wir óóvërhauwëlën.

Ien't bëgin kós ëk ër heejëlëgans niks van en kreeg ëk die stóm kóuwër allë vijf vuujt ien mé gëziecht. Jénnë keejër haspëldën ëk ër óóvër en viel ëk dörhénnë. Óp dën duujër kreeg ëk ër toch lol ien. Zóveul dè'k óp në gëgèèvë mómènt kèèjhèrd lààg të lachën ien ménnë slààp.

Ienjéns kreeg ëk ë sórt éllëbóógstóuwët ien mën zij. "Wajeest, jóng, ligdë wir të dróómë van blóuwëtë neegërinnëtèttën?" Zjuust: die van ós. Zë kós 't wir ës nie lijën dè në miens ës fijn slöpt. Eejënë keejër é, ècht mèr eejënë keejër, en 't is fërdoemën al minstës tien wèè'ë gëleejën, hém ëk ës vurziechtig gëzeed 's mèrrëgës dè'k gëdrómd ha dè'k óp 'n ónbëwónd eiland wààr mi Jennifer Heylen en dèssër fërdoemë fèrrëm ötzààg ien heur gèèl biekienie'ën. Dè was të veul gëzeed.

"Tën jéstë: dè was nie wóók van ööw, zallë. 't Wóuwërd "neegërin" meugdë nie mir gëbrui'ën. Gë moet zéggën: "zwèttë vrààw" of "vrààw mi Afriekansë roets". Tën twéddë wul ik ók nog zéggën dè'k gëwóuwën kurkën èn't springë wààr."

Die van ós kwààm nie mir bé. "Whaahaha! Kurkëspringën! Gé! Hààtërën! Dörbé: gë zult nogal piejààmërë mi öw kniej! Gë kunt nog génjéns tëgoei van dën trap af."

Dëdjuuj jàà, vur eejënë keejër ha zë gëlijk. Dë léstë dààg duu mén kniej zó zeejër as kweet nie wa. 'n Vërkeejërdë bëweeging gëmakt mi öt dën ottó të stappën en tërnàà nog wa gòn fitnëssën en lóópën óp dë lóópbàànd. En nöö vuult mén lingsë kniej azzof z'allë mómèntën öteejën ka vallën. Lóópë, springë, bu'ë, trappë duun ... 't Gi vurlóópëg niej, mi dëm béstë wil van dë wèèrëld niej.

En dan bëgint në miens të dróómë van dings die dè iej nie kan, of nie kan bërei'ën. Vërlangën is schòndër dan hémmën, sóms. 't Miensëlëk brein is iet auwërëgs, dè gòn zë nóuwët kunnën ivvënauwërë mi zówiet as artiefiesjeejël intëlliezjènsiej.

Stélt öw mèr ës veur dèttër 's mèrrëgës iemand teegën öw zi dè gë dë gansën dag absoluut niej èn në róuwëjën hààmër meugt déng'ën. Teegë mé hémmë zë dè óuwët gëzeed, as ékspiriemènt. Awöl, dë gansën dag hém ëk róuwëj hààmërs zien passeejërën ien ménnë kop! Dën heejëlë godsjeunigën dag! En anders déng'ëk nóuwët èn gëtög! Vazzë lèèvë niej! Niej èn schroevëdrèèjërs, niej èn tangën, niej èn hààmërs ... Ik rippëreejër of mààk nóuwët iet, alleejën kapot.

En dan dè róuwëd! Diejën dag hém ëk allës ien't róuwëd gëzien! Hààmërs, miensë, beujëm, gras, dën hónd, ós bankrèè'ëning ... Dè léstë kwààm bé nààdër ienzien umdè die van ós diejën dag toevallëg ötgëbreid was gòn wing'ëlën.

Um mèr të zéggën: gëdààchtë kundë niej alté stuujërën of iendammën. Zé vrij ien öwë kop! En gëniet ërvan! En löt öw èègë gén schuldgëvuulës ènprauwëtën as gë's drómt van Jennifer Heylen ien ë gèèl biekienie'ën!

 ***Danny VANDENBERK***