Ópgënèèjd en zotgëdrèèjd

“As dè hiejër nog lang duujërt dan zal ‘t gààw gëdòn zén!” ‘n Lómmëlsë ötdru’ing um të zéggën dè ‘t gëduld wijdhénnën óp is. En dè gëbeurt teegëworrig amèr rappër en rappër.

Allës, ècht allës mut rap-rap gòn. Dur al dën tèchnissë vurötgang vijnëw rappëchè óp dën duujër vazèllëfsprèè’ënd. Wë zén ër immuun vur gëwóuwërën. Lék në wirliecht surrëfën óp dè intërnét, óóvëral vërbónnë zén mi bloewtoet, watsèp en feesboek, rap wa wébwing’ëlën … Në miens mut mèr óp ë knöpkën dààwën en ‘t gëbeurt. As ‘t ës wa trààgër gi, vuul ‘t lék ‘n fout ien ‘t systeem, ‘n sietëwassie die nie óndër cóntrol is en ietëfwa bënààwd afhang’ëlëk zén van andër miensën. Dè vijnëw nie plëzant en dan zénnëw óp ós óngëmak, óp ‘t rèènë’ë va gëierrieteejërd zén en kauwëd wèjjërën. “Wochtën is wöl ‘t léstën! Ik kan na schòndër pla’ën en hém wöl wa bèètërs të duun mi ménnën tijd dan hiejër wa ónneuzël stòn të wochtën!” Dè klingt nogal arrógant en öt dë högtë, as gë ‘t mé vraagt.

Óóvër högtë gëspróó’ën, wiestë gé dè’t èntal vërdiepë van wollë’ëkrabbërs meej bëpòld wèjjërdt dur dën tijd en ‘t gëduld dè miensë kunnën ópbréngën um të wochtën óp dë lift? Véftien sëcóndën is duunbauwër, feejërtig is nie të vërdrààgën. Dè hémmë zë óndërzócht. Mësschien ók wöl van dë gààw-gààw. Wie wit.

 Iedëreejën is alté mè gëhòst. Tijd is gèld. Veulë meejër nog as vruugër.

Dër is ë fààstfoedréstórant wordè gë gëgarandeejërd binnën óndërhallëvë mënuut öw èètë krégt, andërs krégd’öw gèld gëwóuwën trug ààchtëraf. Ien Japan is ër ‘n buufétréstórant (ol joe kèn iet) wordè gë për mënuut bëtòlt. Hoe rappër dè gë èt, hoe mindër dè gë mut bëtauwëlën. Allës ien dë raptë, sëluuj spijsvërtèèring. Hoeveul zottër gòn zë ‘t nog màà’ën?

Vollëgës mé is në miens van natuujërën öt gëduldig en hoe meejër dè gë die deugd bëhawdt, hoe gëlu’igër dè gë zé. Dur al diejë “vurötgang” gi ós gëduld hoe langs hoe meejër ààchtëröt, zénnëw ‘t wochtë vërleejërd en lóópë wë’r ópgënèèjd en zotgëdrèèjd bé.

“Gëduld oefënën”. Dè’s ‘n andër ötdru’ing vur gëduld hémmën. Dè gi. Dur ien në wing’ël èn dë kas wa të dagdróómën óóvër Honolulu of dur ës të kij’ë wa andër miensën ien hun kar hémmë liggën. Dur ës nën dag génnën harloeziej èn të duun. Dur mi èndacht të èètën en öw més en öw vërkét èfkës neejër të léggën tussën tweejë happë deur en ës heejël óp öw gëmak të knààwën. Dè sórt dings.

Nog nën tip: stèkt ës ë klèè stjéj’ën ien öw lingsë bóksëtès. Zó gààw as dè bëgint të ierrieteejërën of të jöksëlën hòldë ‘t ëröt en gë stèkt ‘t ien öw rèchsë tès. Óp die maniejër kund’öw kòjëchè of öw klèèrë “brèè’ën” of duun afnimmën. Of gë hòlt dè rottig kèèj’ën öt öw tès en gë smét ‘t teegë nën toevalligë vurbégangër zénnë kèèj èn! Umdè ‘t godvërdoemën allëmòl gënoeg gëweest is! Awöl, dan wittë dè gë nog groeimarzjë hét. Róómën is ók nie óp jénnën dag gëbààwd, mè mi heejël veul kèèjën. En mi kèèjveul gëduld.

 Danny VANDENBERK