Dë viesjeuze cirrë'ël
Mé heujërdë nie gààw klààgën óóvër ‘t weejër. Bëhallëvën as ‘t të kààw is, as ër të veul wénd sti, as ‘t rèègënt, sneejëwt, hààgëlt, dóndërt, wirliecht, of as ‘t ècht bënààwd is. Óp ‘t mómènt dè ‘k hiejër lig eest 26 grauwëdën ien dë slopkààmër, mèr ik hém mën èègë vurgënommën um nie të zààgën. ‘t Is vur iedëreejën ‘t zèllëfstën. Dë nààcht. Wë stòn ërveur en wë moetën ërdeur. Zóweest.
‘t Is alleejën dè në miens zó slèècht slöpt, é. Gë bëgint të drèèjën en të keejërën en óp dën duujër gòddë bëginnë të zweejëtën en rappër të òssëmën en as ‘t ècht teegëzit, héddë ók nog van die vuil rotza’ë va muggën die öw kommën ambëteejërën en stèè’ën. En dan kundë nog bëginnë jöksëlën ók. Gén óóg duudë dan diecht.
En hoe langër dè ‘k wa’ër blijf, hoe meejër dè ‘k mën èègë bëgin óp të jààgën ien ‘t gëdààcht dè ‘k dën dag tërnàà, mèrrëgën dus, génnë frang wèjjërd gòn zén. En van diej ópgëjààgdëchè bléfdë klauwërwa’ër. ‘t Is në viesjeuzë cirrë’ël, dè zég ëk öw.
En dan zéggë zë dè në miens gëmiddëld nàà zeuvë mënuutën ien slààp vélt! Amahoela! Bé mé gëbeurt dè nóuwët niej! Alleejën as ëk zat zén mësschien. Ménnën doktër zi dè ‘kik warschénlëk óóvërdag të veul dagdróóm of “wég” zén, wordur mé lijf ë vërvollëg vërwocht ien dë vörm va slààp. Want dagdróómën is ‘t zèllëfstën as dë jéstë slààpfààzë, zi iej. Mèr óóvërdag slààpën, dè ‘s niks vur mé. Gë za ës wa gëkonsëntreejërdër moetë blijvën óóvërdag, en zörrëgën dè gë alté öw gëdààchtën ërbé hawt, dan slaptë ‘s nààchs bèètër, zi dën doktër. En vur diejë zeejëvër ien pèkskës të vërkóópë vreugt diejë gèldwollëf 25 Euro! Zóndër në miens ës dèftëg t’óndërzuuj’ën!
Neejë, Danny, duu gët niej. Bléft kallëm. Öw èègë niej ópjààgën, en al zee’ër niej èn fienansjeejël zàà’ë déng’ën, andërs eest garantiej gëdòn mi slààpën! Vërtélt ien dë plak mè wa teegën öw èègën.
Wiestë dè në miens sóms ècht ien slaap “vélt”? As gë ‘t gëluk hét van dauwëdwèrrë’ëlëk ien slaap të vallën, kundë ien dën óóvërgang van wa’ër zén na slààpën ienjéns ‘n heevëgë stuiptré’ing óóvër gans öw lijf krijgën. Dè vuult ècht as vallën of lék nën éléktrissë schok. Dè is dus nurmauwël. Umdè dë spiejërën óntspannën en dë hèrsës dè óp d’eejën of d’andër maniejër intërprëteejërën as vallën, wordur dë beejën rëfléxmauwëtëg wèjjërën ötgëstrékt um të kunnë blijvë stòn. Dè is nie gëvauwërlëk, mè wöl vërschietèchtëg vur nën ivvëntuuweejëlën bédgënóuwët.
Óóvër bédgënóuwëtë gëspróó’ën … Wiestë dè ‘t hiestooris gëzien nóuwët dë bëdoeling was dè gëtrouwdë koppëls sààmë sliepën? Dè is pas óntstòn ien dë módèrnën tijd. Bé dë Rómeinë vruugër was ‘t nie wauwër. Dur gësnörk, wégtré’ën van dee’ës of làà’ës, bruuskë bëweegingën of onvrijwillëg stampën wèjjërdt në miens öt zénnë slààp gëhààwën, zó zeen zë. Béjeejën gòn liggë was alleejën toegëstòn vur të séksën. Slààpën di iedëreejën ien zénnën èègë nést. Apart.
As ëk nog ës nën ónvërwochsë schuup krijg van die van ós, dan gòn ëk zë dè toch ës zéggën. ‘k Za zë ók nö al kunnë wa’ër màà’ën um të vërtéllën óóvër dë Rómeinën en hunnë séks ... Och neejë, ‘k za zë mè lauwëtë slààpën. Andërs véndt zë mé wir në vétzak. ‘k Zal hiejër óp ménnën alleejënë nog wöl wa róndweemëlën ien ménnë viesjeuzë cirrë’ël. Slopwél.